X

گەڕان




كۆمه‌ڵكاری

3ـ لە خۆگرتنی بەرنامەی سیاسی رەوت:

9/29/2017 11:11:57 PM   |   1815 :بینراو

3ـ لە خۆگرتنی بەرنامەی سیاسی رەوت:

   رەوت بە ئەركی سەرشانی خۆی دەزانێت كە بەرنامەیەكی سیاسی بخاتە بەردەستی رەوتەوانان تا بزانن  رێبازو هەڵوێستییان لە واقیـعی كوردستاندا دەبێ چۆن بێت؟! چونكە حەتمەن رەوتەوانانی ئێمەش دوای موناقەشەی دیدی فیكریی و ئینتیمای كۆمەڵكاریی روو بەڕووی پرسیارێكی سادەو سروشتی دەبنەوە كە پێیان دەڵێن: دیدی دیـنی و فیكری ئێوەش مەدرەسەیەكی گشتییەو بۆ كوردو غەیری كوردیش دەشێت، بەڵام ئایا ئێوە بەرنامەی سیاسییتان بۆ واقیـعی كوردستان چییە؟! ئەو كۆمەڵگەی ئێوە دەتانەوێت لە ناو كورددا دروستی بكەن چۆنەو چ واقیعێكی دەبێت؟!

   وەڵامی ئەمە بۆ رەوتەوانان پێویستترە وەك لە خەڵكی تر.. ئێمە پێویستیمان بە بەرنامەیەكی سیاسی هەیە بیخەینە پێش چاوی میللەتی خۆمان و بڵێین خەڵكینە كە ئێمە دێینە پێشێ لە زەمینەی فیكریی و دیدی دینییمانەوە بەرنامەیەكی سیاسی دەخەینە بەردەست، كە ئەمە هەندێك سیماو سیفاتێتی:

1ـ ناساندنی ئینتیمای عەقائیدی كوردستان: هەر ووڵاتێك شەرع تێییدا سەروەر بوو، هیچ یاسایەك بە پێچەوانەی ئەوەوە دەرنەدەچوو، موسوڵمانانی ئەمانی خۆیان بە دەست خۆیانەوە بوو، دەیانتوانی بە ئاشكراو ئەمان نوێژی جومعەو جەژنەكان و دروشمەكانی تری پەرستنیانی تێدا بكەن، ئەوە دارولئیسلامە.. هەر ووڵاتێكیش شەرع تێییدا سەروەر نەبوو، دەستوورو یاسای بە پێچەوانەی شەرع بوو، موسوڵمانانی ئەمانی خۆیان بە دەست خۆیانەوە نەبوو، نەیاندەتوانی بە ئاشكراو ئەمان نوێژی جومعەو جەژنەكان و دروشمەكانی تری پەرستنیانی تێدا بكەن، ئەوە دارولكوفرە.. ئەگەر پێشتر دارولئیسلام بووبێت و ئێستا بووبێتە دارولكوفر پێویستە لەسەر موسوڵمانان هەوڵ بدەن تا دەیكەنەوە بە دارولئیسلام.. دەنا هەر هەموویان تاوانبار دەبن لەسەر ئەو لادان و رادانەی سەروەری شەرع و دەسەڵاتی سیاسی هەڵبژێرراو.. رەوت لەم روانگەوە دەڕوانێتە كوردستان، كە بۆتە دارولكوفرو ئەوە لەسەر موسوڵمانان فەرز بووە كە دەبێ سەروەری شەرعی بۆ بگـێڕرێتەوەو دەسەڵاتی حوكمڕانیشی بكەوێتەوە دەست میللەتەكە تا بە ئازادی خۆیان دەسەڵاتی سیاسی بۆ هەڵبژێرن..

2ـ ووڵاتی كوردستان: ئەگەر توانرا بەشەكانی كوردستان لە ووڵاتانی داگیركار داڕنرێت و سەربەخۆ بێت، ئەوە حاڵی وەكو حاڵی ووڵاتانی تری ناوچەكە دەبێت و ئێمەش بەشێكین لە دانیشتوانەكەی و ماف و ئەركی هاووڵاتێتیمان دەكەوێتە سەر.. ئەگەر هەر وا دابڕدابڕ مایەوە، ئەوە هەوڵ دەدەین سیستمی ویلایاتی ئیسلامی بۆ عـێراق بكەینە سیستمی حوكم كە لە سیستمی ئیداری فیدراڵی پێشكەوتووترە، ئەو كاتە هەر یەك لە سێ پێكهاتەی عـێراق: كوردو عەرەبی سوننەو عەرەبی شیعە لە هەرێـمی دیاری كراوی خۆیاندا حكومەتی هەرێم هەڵدەبژێرن و ئیدارەی خۆیان بە پـێی بۆچوونی زۆرینەی دانیشتوانی ناوچەكەیان دەبەن بەڕێوە.. هەر هەرێمەش بە گوێرەی رێژەی دانیشتوانیی بەشداری لە پێكهێنانی حكومەتێكی مەركەزیی هاوبەشدا دەكەن لە بەغدا.. ئەمە مافی هەموو پێكهاتەیەكی تری قەومی یان دیـنی و مەزهەبی تری عـێراقە كە رێژەیان لە ناوچەیەكدا بگاتە ئەوەی هەرێـمی خۆیان هەبێت.. ئەگەر نا بە مافی تەواوی خۆیانەوە بە كەمینە لە هەرێمەكەدا دەژین..

3ـ نان و ئەمان بۆ هەمووان: ئێمەی رەوت پێمان وایە كە مسۆگەر كردنی تێریی و ئەمان مافە سەرەتاییەكانی هەموو گیانلەبەرێكن چ جای ئەم مرۆڤەی خوا رێزی لێناوە.. ئێمە لە قورئانی خوادا دەبینین ئەو قورەیشیانەی كە كەعبەی ماڵی خوایان كردبوو بە بتخانەو مۆڵگای شیرك، خوای گەورە ئەم دوو مافەی لێ نەستاندنەوە، وەكو دەربارەیان دەفەرموێ: (أَطْعَمَهُم مِّن جُوعٍ وَآمَنَهُم مِّنْ خَوْفٍ) قریش/4 واتە لە برسێتی قوتاری كردن و تـێری كردن، لە ترس و بیمیش رزگاری كردن و ئەمانی دانێ.. لەم روانگەشەوە هەموو دانیشتوانی ژێر دەسەڵاتی رەوتی ئێمە ئەم دوو مافەیان بۆ دەستەبەر دەكرێت.. ئەوەش یەعـنی نەمانی گەندەڵیی و تەزكیەی حزب و فەرق و جیاوازی قەومێـتی وزارگۆتن (لەهـجە)و مەزهەب و ناوچەو عەشرەت و ئینتیمای حزبایەتی و..هتد. ئەمانیش، ئەمانی ژیان و رێزو دیدی سیاسی و خاوەنێتی و نەریتی كۆمەڵایەتی تایبەت و هەموو تایبەتێتیەكانی تر.

4ـ سنووری من كۆتایی دێت كە سنوری تۆ دەست پێ دەكات: ئێمەی رەوت بە هەموو دانیشتوانی كوردستان دەڵێین: سنوری من كۆتایی دێت كە سنوری تۆ دەست پێدەكات.. بۆ ئەوەی لە ئێستاوە ئەمانی بدەینێ، دڵنیای كەینەوە باوەڕ نەبوونی ئەو بە ئیسلام نابێتە هۆی لێسەندنەوەی مافی نان و ئەمان، بە مەرجێك نەبێتە كافری شەڕانی، واتە: نەچێتە بەرەی جەنگی كافرانەوە. ئێمە لەوە ناترسین كە تۆ لیبراڵییت یان یەزیدی، هێگڵت پێ موهیمترە یان ماركس.. مادام لاشەڕیت، مادام نەبوویت بە جاسوس لەسەر ئێمە، خیانەتت لێ نەكردووین، ئێمە هیچ پەیوەندییەكی غەیری ناسین و رەفتاری جوانمان لەگەڵتدا نابێت.. وەڵامی ئەفكاری تۆ بە ئەفكار دەدەینەوە.. كە زۆرینەیەكی شەعبیمان پێك هێناو دەسەڵاتی رەهای سیاسەتمان كەوتە بەر دەست ئەو كاتە لە مەرجەعییەتی دەستوورەوە ئەو یاسایانە دەردەكەین كە نەهێڵین سووكایەتی بە پیرۆزییەكانی دینەكەمان بكرێت..

   ئێمە هەمووان بێ خەم دەكەینەوە لەوەی كە ئێستاش و لە داهاتووشـدا بە ئەركی خۆمانی دەزانین پێكهاتە دیمۆگرافیەكەی كوردستان بپارێزین، بە پاراستنی دەستەجەمعی ئینتیماكانی خەڵك، وەكو ئینتیمای دیـنی  مەزهەبی و قەومی و هۆزو حزبایەتی و.. هتد.. چونكە راستە ئێمە ئەندامی ئوممەتە موسوڵمانەكەین كە ئینتیمایەكی عەقائیدییەو لە هەموو شوێنێكی سەر زەوی هەیە، بەڵام پاراستنی هاووڵاتیانی دارولئیسلامەكەشمان (با كافریش بن وەك مەسیحی و یەزیدی و ئەوانی دیكە) بە ئەركی شەرعی خۆمان دەزانین..

   ئێمە پێمان وایە بە چەسپاندنی ئەم دوو دروشمەمان: (نان و ئەمان بۆ هەمووان) و (سنووری من كۆتایی دێت كە سنوری تۆ دەست پێ دەكات) دادی یەكسانیی دێنینە پێش، بەزەیی و متمانەو دۆستایەتی لە نێوان خەڵكیدا گەشە پێ دەدەین، گیانی تەبایی و یەكتری پاراستن دەكەینە واقیعی كۆمەڵگەكەمان..

5ـ دەستووری هەرێم: رەوت ئەوە دەخاتە پێش چاوان كە باوەڕی وایە دامەزراندنی ئیدارەیەكی شیاو بۆ هەرێم لەسەر دوو پێ دەوەستێت: (بە پـێی دەستوور) و (بە هەڵـبژاردن) دەبێت.. ناشێت خەڵكانێك بە هـێز یان پارەو پلە یان چەواشەكاریی پێچەوانەی دەستوور دەسەڵاتێك دامەزرێنن.. هەر وەكو كە ناشێت بە ئینقیلابی سەربازیی بێنە سەر حوكم.. دەستووریش دەبێت پێشتر لە لایەن پسپۆڕانەوە نوسرابێتەوەو میللەت موناقەشەی ناوخۆیی كردبێت و پاشان راپرسی لەسەر كرابێت و بووبێتە دەستووری رەسمی هەرێم.. دەسەڵاتی سیاسیش دەبێت ئازادانە لە لایەن دانیشتوانی كوردستانەوە هەڵبژێررابێت.. هەردوو روكنەكە پێكەوە مەرجن بۆ شەرعێتی بوون.

6ـ جوێ كردنەوەی دەسەڵاتەكان: رەوت پـێی وایە كە جوێ كردنەوەی هەر سێ دەسەڵاتەكان لە یەكتریی: دەسەڵاتی یاسادانان، (ئەنجومەنی نیشتیمانی) دەسەڵاتی جێبەجێكردن (حكومەت)، دەسەڵاتی داوەریی (قەزاوەت) پێداویستی سەرەكی دادو یەكسانی و سەروەری یاسایە و رێگرتنە لە دیكتاتۆریی..

   هەروەها جەخت كردنەوە لەسەر سەربەخۆیی دادگاو دژایەتی كردنی هەر بەربەستێك كە    سەربەخۆیی دادگا لاواز بكات.


كۆمه‌ڵكاری