ئایا ئه‌گه‌ر له مه‌جلیسێکدا کوفر بکرێت پێویسته له مه‌جلیسه‌که هه‌ستیت؟ ئه‌گه‌ر که‌سێک به کوفره‌که پێ بکه‌نێت به‌ڵام نیه‌تی پاک بێت و پێی ناخۆش بێت ئایا گوناحبار ده‌بێت؟
به‌ته‌ئکید هه‌ڵوێستی یه‌که‌م زۆر چاک و راسته. تۆ ئامۆژگاری که‌سه‌که ده‌که‌یت که کوفره‌که ده‌کات، به‌ڵکو کاریگه‌ری له‌سه‌ری بێت و ته‌وبه بکات؛ ئه‌گه‌ر کاریگه‌ری نه‌بوو، ئه‌وه تۆ له مه‌جلیسه‌که هه‌ڵده‌ستیت و ده‌ڕۆیت.
پاشان ئه‌و که‌سه‌ی که له‌وێ ماوه‌ته‌وه‌و به کوفره‌که پێکه‌نیوه ئه‌گه‌ر وایه که جه‌نابت باسی ده‌که‌یت، یه‌عنی ئیمان و باوه‌ڕی هه‌یه به‌ڵام ته‌نها سه‌ر له‌قاندنێک و پێکه‌نینێکه، ئه‌وه وا نازانم پێی کافر بووبێت به‌ڵام به ته‌ئکید گوناحبار ده‌بێت و گوناحه‌که‌شی گه‌وره‌یه. له سه‌رده‌می عومه‌ری کوڕی عه‌بدولعه‌زیز کابرایه‌ک به‌ڕۆژوو بوو، له‌گه‌ڵ سێ چوار که‌س دانیشتبوو که شه‌رابیان خواردبۆوه، که هێنانیان بۆ لای عومه‌ری کوڕی عه‌بدولعه‌زیز بۆ ئه‌وه‌ی حوکمه‌که‌یان له سه‌ر ته‌تبیق بکات فه‌رمووی: به‌و که‌سه ده‌ست پێ بکه‌ن که به‌ڕۆژوو بووه! یه‌عنی نه‌شیخواردۆ‌ته‌وه به‌ڵام هه‌ر حوکمی له‌سه‌ر بده‌ن چونکه له‌گه‌ڵ ئه‌وان دانیشتووه. بۆیه ناشێت ئینسانی موسوڵمان و ئیماندار له شوێنێکدا بێت که کوفر ده‌کرێت و جنێو به خوای په‌روه‌ردگار ده‌وترێت یان به پێغه‌مبه‌ری نازدار (علیه الصّلاة والسّلام) یان ئیهانه‌ی ئیسلامه‌تییه‌که ده‌کرێت.